O'zbekiston Prezidenti va Pokiston Bosh vaziri Afg'onistondagi vaziyatni muhokama qilishdi

Shavkat Mirziyoyev Dushanbega tashrifi chog'ida Pokiston Bosh vaziri Imron Xon bilan muzokara o'tkazdi. Davlat rahbarlari Afg'onistondagi vaziyatni muhokama qilishdi.

O'zbekiston Prezidenti matbuot xizmatining xabar berishicha, uchrashuvda tomonlar shu yilning iyul oyida Toshkentda bo'lib o'tgan ikki davlat rahbarlarining sammitida erishilgan O'zbekiston-Pokiston ko'p qirrali hamkorligini rivojlantirish bo'yicha kelishuvlarning amalda bajarilishini muhokama qilishdi.

Qayd etilishicha, yil boshidan buyon o'zaro tovar ayirboshlash 2,5 barobar oshgan, 30 dan ortiq yangi qo'shma korxona tashkil etilgan. Toshkent va Lahor o'rtasida havo qatnovi tiklandi.

Ikki davlatlar o'rtasida samarali ishbilarmonlik aloqalarini kengaytirish uchun qulay shart -sharoitlar yaratish bo'yicha hamkorlikdagi ishlarning ahamiyati ta'kidlandi. Bu birinchi navbatda imtiyozli savdo to'g'risidagi bitimni tezroq qabul qilish, tranzit va savdo aloqalari to'g'risidagi shartnoma qoidalarini amalga oshirish, qabul qilingan "yo'l xaritasi"ga muvofiq iqtisodiyotning turli sohalarida investitsiya loyihalarini amalga oshirish haqida kelishib olindi.

Uchrashuvda Afg'onistondagi hozirgi vaziyat va mintaqadagi vaziyat yuzasidan fikr almashildi. Mintaqaviy xavfsizlikni ta'minlash masalalari bo'yicha yaqin hamkorlikni davom ettirish to'g'risida kelishuvga erishildi.

Eslatib o'tamiz, avvalroq Shavkat Mirziyoyev Dushanbeda Eron prezidenti bilan uchrashgan edi. Uchrashuvda davlat rahbarlari amaliy hamkorlikni kengaytirish yo'llarini muhokama qilishdi.